Talumpati sa protesta sa Katipunan kontra sa paglibing sa diktador na si Marcos

Posted: November 18, 2016 in Uncategorized

​Nobyembre 18, 2016

Larawan mula sa Philippine Collegian

Magandang gabi mga kababayan, mga kapatid. Nais ko munang magbigay-pugay sa mga tunay na bayani. 
Sa mga biktima ng Martial Law na hanggang ngayon ay patuloy na lumalaban para sa hustisya. Sila ang mga tunay na bayani. 
Sa mga martir ng UP at iba pang unibersidad, sa mga kabataang sumapi sa New People’s Army (NPA) at nag-alay ng buhay para labanan ang diktadura. Sila ang mga tunay na bayani. 
Sa mga naghain ng kaso sa Korte Suprema para labanan ang paglibing. Natalo man sila sa kaso, bayani rin sila sa ating puso. 
Sa kabataan at mamamayang patuloy na lumalaban. Kayo ang mga tunay na bayani. 
Nais ko namang banggitin ang mga may kasalanan kung bakit tayo naririto ngayon. 
Ang pamilya Marcos, na hanggang ngayon ay ayaw aminin ang kanilang kasalanan sa bayan at ginagawa ang lahat para baluktutin ang kasaysayan at makabalik sa Malacanang. 
Ang Korte Suprema na naggawad ng desisyong pabor sa paglibing at naghahawan ng daan para linisin ang rekord ni Marcos, na siya daw ay hindi purely evil at tulad din natin na nagkakamali din. Neknek nyo!
Si Pangulong Duterte, at ang kanyang pakikipag-alyansa sa mga Marcos, pag-utos sa paglibing, at pagiging instrumento ng pampulitikang rehabilitasyon at panunumbalik ng mga Marcos. Anong klaseng “change is coming” yan?
Ang lahat ng gobyerno matapos kay Marcos na nagtaguyod ng bulok na sistema sa pulitika, ng political accommodation at burukrata kapitalismo, na hindi nagpursige para panagutin ang mga Marcos at igawad ang hustisya sa mga biktima. Kasama na dyan ang 2 rehimeng Aquino. Kayo ang lumikha ng mga batayan para makabalik sa poder ang mga Marcos. Si Imelda naging congresswoman. Si Imee naging congresswoman at gobernador. Si Bongbong naging senador, muntik pang maging bise-presidente. 
Ngayon, lalong napatunayan kung gaano kabulok ang ating sistema. Ngayon mas naging malinaw na dapat itong  baguhin. Sa mga kabataan, kayo ang pag-asa ng bayan at inaasahang mangunguna sa pagbabagong ito, kasama ang sambayanan. Kayo din ang magtitiyak na hindi nila mababago pa ang hatol ng kasaysayan at mananaig ang katotohanan.
Wala na po sa Korte ang laban. Nasa kalsada na, sa mga classroom ng mga kabataan, sa mga komunidad, sa mainstream at social media, sa kamalayan ng bawat isang Pilipino. Patuloy tayong lumaban para sa hustisya, para itaguyod ang hatol ng kasaysayan at para baguhin ang ating lipunan. 
Mabuhay kayo! Mabuhay ang sambayang Pilipino!

Comments are closed.